Ministri Mustafa bisedoi me përfaqësues të Organizatës për Ushqim dhe Agrikulturë të OKB-së

Ministri Mustafa bisedoi me përfaqësues të Organizatës për Ushqim dhe Agrikulturë të OKB-së

Ministri i Bujqësisë, Pylltarisë dhe Zhvillimit Rural, Besian Mustafa ka zhvilluar një takim virtual me përfaqësuesit e Organizatës për Ushqim dhe Agrikulturë (FAO) të Organizatës së Kombeve të Bashkuara, ku bashkëbisedoi me udhëheqësin regjional të ngarkuar për Kosovë, Raimund Jehle të shoqëruar nga zyrtarë të FAO-s.

Në takim, mes tjerash u diskutua rreth programit të FAO-s për rritjen e transparencës dhe forcimin e kapaciteteve institucionale në qeverisjen e mirë dhe zbatimin e politikave, strategjive dhe programeve kombëtare pyjore, thuhet në një njoftim të kësaj ministrie.

Kjo ministri ka bërë të ditur se në takim gjithashtu u diskutua edhe mbi krijimin e kushteve të përshtatshme për legalizimin e drurit, tregtinë dhe zbatimin e ligjit në sektorin e pyjeve.

“Po ashtu, u fol edhe mbi prezantimin e menaxhimit shumë nivelesh të pyjeve dhe zinxhirëve gjithëpërfshirës të vlerës së pyjeve për zbutjen e varfërisë së grave dhe burrave rurale”, thuhet ndër të tjera në njoftim.

Po ashtu temë tjetër ishte edhe organizimi i eventit për fillimin e projektit “Përkrahje për fuqizimin e menaxhimit të qëndrueshëm dhe shumëqëllimor të pyjeve për të përmirësuar jetesën në vendet rurale dhe adresimin e ndryshimeve klimatike në Kosovë”,  i cili do të mbahet me 28 tetor në mënyrë virtuale./Aleanca.press/