Shkon në 21 numri i të vrarëve në shkollën e Teksasit, mes tyre 19 fëmijë

Shkon në 21 numri i të vrarëve në shkollën e Teksasit, mes tyre 19 fëmijë

Nëntëmbëdhjetë nxënës dhe dy të rritur kanë vdekur nga të shtënat në një shkollë fillore në pjesën jugore të Teksasit.

Një sulmues 18-vjeçar hapi zjarr në Shkollën Fillore “Robb” të qytetit Uvalde para se të vritej nga forcat e sigurisë, thanë zyrtarët amerikanë.

Hetuesit thanë se sulmuesi kishte qenë i armatosur me një pistoletë, me një pushkë gjysmë-automatike të llojit AR-15 dhe kishte pasur karikatorë me kapacitet të lartë.

Adoleshenti dyshohet se fillimisht ka qëlluar gjyshen e tij dhe më pas ka vazhduar sulmin.

Mediat lokale raportuan se ai mund të ketë qenë nxënës i një shkolle të mesme në atë zonë.

Shefi i policisë për qarkun e pavarur të shkollës Uvalde, Pete Arredondo, tha se të shtënat kishin filluar në orën 11:32 sipas kohës lokale gjatë së martës, dhe hetuesit besojnë se sulmuesi ka “vepruar i vetëm gjatë këtij akti të tmerrshëm”.