Sporti e kultura, sukseset kryesore të Kosovës gjatë këtij viti

Sporti e kultura, sukseset kryesore të Kosovës gjatë këtij viti

Sukseset në sport dhe në kulturë kanë dominuar ngjarjet pozitive të Kosovës gjatë vitit 2021. Xhudo u bë sërish lajmi kryesor i vitit. Distria Krasniqi dhe Nora Gjakova fituan medalja të arta në Lojërat Olimpike Verore “Tokio 2020”. Por, sukses pati edhe filmi kosovar. Filmi “Zgjoi” me regji të Blerta Bashollit, fitoi shumë çmime dhe është në garë të ngushtë për të fituar çmim Oscar.

“Zgjoi” i Kosovës

Historia e Fahrije Hotit, një gruaje nga Krusha e Madhe e Rahovecit, që është në kërkim të burrit të saj të humbur në luftën e fundit në Kosovës, preku ndjenjat e qindra-mijëra shikuesve të filmit “Zgjoi”. Ky film fitoi disa nga çmimet kryesore të Sundance Film Festival, një nga festivalet më të njohura të filmit. Më 3 shkurt 2021, filmi artistik “Zgjoi” me regji të Blerta Bashollit fitoi tri çmimet kryesore: Filmi më i mirë, Regjisorja më e mirë dhe Çmimi i Publikut. Sundance Film Festival është festivali më i madh i filmit të pavarur në Shtetet e Bashkuara të Amerikës.

Netflix njeh Kosovën

Platforma Netflix deri vonë nuk e kishte të përfshirë Kosovën në listën e shteteve. Për ta bindur këtë kompani që ta fusë Kosovën në listë, u organizua një fushatë disamujore për mbledhjen e nënshkrimeve. Në fund u mblodhën 37 mijë nënshkrime dhe në muajin prill, Netflix iu përgjigj pozitivisht kërkesës duke shtuar Kosovën në platformën e saj me kodin telefonik +383.

Sërish xhudo

Në Lojërat Olimpike Verore “Tokio 2020” që u zhvilluan në Japoni, xhudistja Distria Krasniqi fitoi medalje të artë më 24 korrik. Medalja olimpike për Distria Krasniqin pasoi shumë suksese të saj në gara të ndryshme, përfshirë kampionate evropiane e botërore. Medalja e saj olimpike u bë e dyta që xhudo i kishte sjellë Kosovës pas suksesit të Majlinda Kelmendit në gushtin e vitit 2016 në kuadër të Lojërave Olimpike “Rio 2016”.

E arta e Norës

Vetëm dy ditë pas suksesit të Distria Krasniqit, xhudistja tjetër, Nora Gjakova, gëzoi shqiptarët pasi më 26 korrik fitoi medaljen e artë olimpike. Në një garë të fortë në finale, në kategorinë deri në 57 kilogramë, Nora e mposhti francezen Sarah-Léonie Cysique. Medalja e Norës ishte medalja e dytë e artë që Kosova r fitoi në Lojërat Olimpike “Tokio 2020”.

Të artat e Kosovës kthehen në atdhe

Në kryeqytetin e Kosovës, Prishtinë, më 2 gusht u organizua pritje për ekipin e xhudos pas pjesëmarrjes në Lojërat Olimpike “Tokio 2020”. Dy xhudistet e Kosovës, Distria Krasniqi dhe Nora Gjakova, morën dy medalje të arta në këto lojëra. Në “Tokio 2020”, Kosovën e përfaqësuan 11 atletë në gjashtë sporte.

Shpërblehen filmat nga Kosova

Filmat nga Kosova arritën sukses në festivale të ndryshme gjatë vitit 2021. Tre filma nga Kosova fituan çmime të rëndësishme në Festivalin e Filmit në Sarajevë (SFF). Çmimi “Zemra e Sarajevës” për aktoren më të mirë e fituan aktoret e filmit “Luaneshat e Kodrës”: Flaka Latifi, Era Balaj dhe Urata Shabani. Çmimi për promovimin e barazisë gjinore iu dha Norika Sefës për filmin “Në kërkim të Venerës”. Ndërkaq, mirënjohja e veçantë e jurisë iu nda filmit “Pa vend” me regji nga Samir Karahoda. Ceremonia e ndarjes së këtyre çmimeve u mbajt në qytetin e Sarajevës më 19 gusht.

“Zgjoi” s’i ndal sukseset

Në fund të muajit tetor, filmi “Zgjoi” iu rikthye sukseseve. Këtë herë filmi “Zgjoi” nga Blerta Basholli fitoi dy çmimet kryesore në edicionin e 66-të të “Valladolid International Film Festival” në Spanjë. Aktorja në rolin kryesor, Yllka Gashi, u zgjodh aktorja më e mirë, ndërsa “Zgjoi” fitoi çmimin “Fundos”, shkruan REL.

Distria, më e mira në botë

Se viti 2021 ishte një sukses i jashtëzakonshëm për xhudisten Distria Krasniqi u konfirmua më 18 dhjetor, kur Federata Ndërkombëtare e Xhudos e shpalli atë si xhudisten më të mirë të vitit 2021. Përzgjedhja e saj u bë përmes një votimi të organizuar nga Federata Ndërkombëtare e Xhudos.

Driton Kuka, më i miri në botë

Trajneri i xhudisteve më të suksesshme të Kosovës, Driton Kuka, u shpall trajneri më i mirë në botë më 18 dhjetor nga Federata Botërore e Xhudos. Përveç shumë çmimeve në kampionate të ndryshme evropiane e botërore, xhudistët që i ka trajnuar Driton Kuka arritën t’i sjellin Kosovës tri medalje të arta olimpike – Majlinda Kelmendi në vitin 2016 si dhe Distria Krasniqi dhe Nora Gjakova në vitin 2021.

“Zgjoi” më pranë nominimit për Oscar

Pas shumë sukseseve në festivale të filmit, “Zgjoi”, është futur në listën e ngushtë për nominim për çmimin prestigjioz Oscar. “Zgjoi” bën pjesë në listën e ngushtë të 15 filmave ndërkombëtarë për edicionin e 94-të të Çmimit Oscar. Filmi që është frymëzuar nga historia e vërtetë e Fahrije Hotit nga Krusha e Madhe, e cila në kërkim të burrit të saj të humbur gjatë luftës në Kosovë, fillon një biznes bujqësor për ta siguruar mbijetesën e familjes, ka marrë vlerësim mjaft pozitiv nga kritikët e filmit./Aleanca.press/